रौतहट,१७ माघ।
इलाका प्रहरी कार्यालय महेन्द्रनगरको थुनुवा कक्ष फोडेर फरार भएका ६ थुनुवा मध्ये एक जना पक्राउ परेका छन् भने पाँच जनाको खोजी तीव्र पारिएको छ ।
हातहतियार तथा खरखजाना मुद्दाका आरोपित २८ वर्षीय रोशन महतो सोमबार नै पक्राउ परिसकेका छन् । प्रहरीले उनलाई फरार भएको १२ घण्टा नबित्दै पक्राउ गरेको छ । आइतबार राति महतोसहित थुनुवा कक्ष फोडेर ६ जना विभिन्न मुद्दाका आरोपि फरार भएका थिए ।
धनुषा मिथिला नगरपालिका ५ का महतो यही माघ १२ गते नक्टाझिजबाट हतियार (पेस्तोल)सहित पक्राउ परेका थिए । उनी चार दिन थुनामा बसेका थिए । उनलाई प्रहरीले हतियार खरिद–बिक्री गर्ने गरेको आरोपमा पक्राउ गरेको थियो । यही मुद्दामा फरार भएका उनका साथी शंकर महतो भने अझै फरार छ ।
सुरुमा शंकर रोशनकै बयानपछि पक्राउ परेका थिए । महतोद्वयलाई प्रहरीले गत शनिबार पत्रकार सम्मेलन गरी सार्वजनिक गरेका थिए । त्यसको भोलिपल्ट आइतबार उनीहरुलाई पाँच दिन म्याद थपी प्रहरीले आवश्यक अनुसन्धान गरिरहेका थिए ।
